Cultura ‘de proximidade’ para formar e dar acceso a novos públicos

Máis de medio cento de persoas vinculadas ao sector na cidade asistiron ao Encontro que pecha a fase de elaboración do programa cultural do BNG para as eleccións de maio.

Manuel Lourenzo, Eli Ríos, Felipe Senén, Beatriz Maceda, Miguel Pernas, Dores Tembrás, Saleta Goi e Cesáreo Sánchez, entre outros, xunto a parte da candidatura do BNG ás municipais vinculada á lingua e a cultura, como Anxa G. Refoxo, Carme Sanjulián, Xosé Iglesias ou Celia Armas, representantes de asociacións culturais, librarías ou editoriais e mesmo colectivos como o Proxecto Cárcere, participaron do Encontro de Cultura deste xoves co que as nacionalistas remataban o proceso de recollida de propostas para o programa de cara as eleccións de maio. Máis de medio cento de persoas do mundo da cultura nun acto no que xunto a Francisco Jorquera, candidato do BNG á Alcaldía, tomaron a palabra María Xosé Bravo, candidata ao Congreso pola Coruña e ex-concelleira nacionalista de Cultura, e Mercedes Queixas, a número 3 da lista para as municipais, quen desde hai meses traballa na elaboración do programa de cultura do BNG a través de conversas e reunións con ducias de persoas que traballan no sector.  

“Queremos facer da Coruña un epicentro cultural, para a veciñanza, presente en todos os barrios, próxima e accesíbel para todos os públicos, para aqueles que xa están e acoden, pero tamén para outros públicos”, dixo Mercedes Queixas durante o encontro. “Temos que formar novos públicos que participen da festa da cultura”, insistiu a candidata. Mais, precisou Queixas, falar de cultura “non só é programar eventos, ten que ir moito máis alá: porque a cultura é unha ferramenta de cohesión social e de transformación social, en canto a que contribúe a formar un pensamento crítico“.

Mercedes Queixas fixo referencia á cidade creativa que as nacionalistas aspiran a ir axudando a construír a partir de maio. “Para nós é necesario escoitar e dialogar con este pulso vital creativo da cidade”, dixo dirixíndose ao nutrido grupo de representantes do sector cultural da cidade, “que sabemos que non está debidamente posto en valor nin é recoñecido pola veciñanza”. Queixas incidiu nalgunha das propostas avanzadas este martes en rolda de prensa e indicou que a recuperación da Festa do Libro, a creación do ‘cheque cultural’ ou a posta en marcha dunha Escola Municipal de Artes Escénicas e dunha programación teatral estábel en galego, tiveron xa moi boa acollida.


Lingua e locais

Pola súa banda, María Xosé Bravo fixo unha defensa da lingua e sinalou, entre as demandas que levará o BNG á campaña do Congreso este mes, a reclamación dunha maior presenza da lingua galega nos medios públicos de comunicación e na programación internacional do Instituto Cervantes, e tamén se queixou da escasa atención que recibe a Real Academia Galega por parte do Estado. Ademais, Bravo advertiu que o BNG continuará a exixir que o galego manteña o seu espazo na Administración Pública. “Se eu teño dereito a usar a lingua galega, quen está na Administración debería coñecela e permitirme facer efectivo o meu dereito”, indicou.

No diálogo posterior ás intervencións, os asistentes lamentaron a precariedade, en canto a condicións laborais, vive a maioría do sector, tanto profesionais como empresarios, e demandaron máis apoio desde a Administración, tamén facendo pé no apoio as expresións culturais en galego. As nacionalistas recolleron ademais unha queixa recorrente entre as entidades do tecido colectivo da cidade: a falta de locais público. Francisco Jorquera comprometeuse a dar resposta desde o Concello a esta demanda, no só de locais sociais, senón tamén de locais para a creación e a exhibición das expresión artísticas. 

As medidas do programa avanzadas

  1. Creación do Consello Municipal da Cultura.
  2. Instaurar ‘cheques culturais’ para o acceso á cultura de todas e todos.
  3. Creación dunha Escola de Teatro galego.
  4. Recuperar a Festa do Libro.
  5. Creación dunha Rede Única de Bibliotecas.
  6. Creación dunha Factoría Cultural.
  7. Posta en marcha dun programa de Residencias Culturais.
  8. Creación dun Catálogo de recursos culturais da cidade.
  9. Recuperación da Casa Cornide.
  10. Reforzar a visibilidade e o aproveitamento das diferentes casas museo da Coruña.
  11. Revitalizar os museos da cidade, con especial atención aos museos científicos, e o Arquivo Municipal.
  12. Recuperación do festival AchegArte.

Partilla!

Share on facebook
Facebook
Share on twitter
Twitter
Share on whatsapp
WhatsApp
Share on telegram
Telegram
Share on email
Email

Deixa un comentario