Jorquera propón unha lonxa de mariscadores e un museo do mar

O candidato do BNG á Alcaldía subliña que os barrios da franxa litoral foron os que máis sufriron a expansión do porto a causa da contaminación, o ruído e a perda de elementos patrimoniais.

O primeiro é completar o traslado ao porto exterior, e para iso hai que resolver dúas cuestións: o acceso ferroviario a aquel porto e a débeda xerada. Nestes aspectos, a nivel estatal, esta foi unha lexislatura perdida”, dixo Francisco Jorquera, o candidato nacionalista á Alcaldía, esta mañá durante un debate no Forum Metropolitano sobre o futuro da franxa litoral organizado pola AAVV Oza A Gaiteira Os Castros.

Jorquera avanzou algúns elementos que fan parte da visión dos terreos do porto interior e que o BNG levará ao seu programa electoral para as municipais: “o porto interior debe manter actividade produtiva e nós pensamos que crear unha lonxa de mariscadores contribuiría a iso; do mesmo xeito que a identidade mariñeira da Coruña precisa que o porto e a lonxa se abra á xente, e pensamos que crear un museo do mar e aula do mar contribuirían a recuperar a relación cidade-porto”.

Accións inmediatas no contexto actual

Máis aló das medidas a desenvolver no próximo mandato, o candidato nacionalista fixo referencia a cuestións de actualidade na axenda local e reafirmou a oposición do BNG á instalación dunha planta de tratamento de residuos na dársena de Oza, e lembrou tamén que as nacionalistas veñen demandando un incremento da vixilancia das descargas de carbón para asegurar que se están a cumprir os protocolos.

Francisco Jorquera falou ademais sobre a necesidade de completar a restauración do Faro de Oza e dotalo dun uso permanente, así como a oportunidade de negociar co UDC para recuperar a Capela. Jorquera indicou tamén que a concesión ao Concello da Coruña dos antigos estaleiros de Valiñas está a piques de rematar sen que se avanzara no proxecto de crear a Escola de Deportes Náuticos da que se falou no seu día.

Partilla!

Share on facebook
Facebook
Share on twitter
Twitter
Share on whatsapp
WhatsApp
Share on telegram
Telegram
Share on email
Email

Deixa un comentario