Queixas Zas e Armesto: honestidade e compromiso fondo co país

"Nós non traballamos para a galería, sabemos que as nosas ideas se poden facer realidade", dixo Mercedes Queixa na súa primeira entrevista como candidata. "Hai que defender os servizos públicos nun mundo de crecente desigualdade", anotou Xosé Luís Armesto, que pechará a lista.

Falou Francisco Jorquera dunha candidatura diversa e solvente durante a presentación do primeiro tramo da lista o día 2 en María Pita. Ese día xa se coñecía que Mercedes Queixas Zas, docente, escritora, activista da cultura e da defensa da lingua, ía facer parte do equipo de Jorquera nun posto relevante, o número 3. Queixas, de 50 anos, residente nos Mallos, manifestaba eses días nunha entrevista en Onda Cero Coruña a súa confianza no candidato a alcalde. “Agradézolle que dera ese paso que para min foi moi, moi ilusionante. E agradézolle que me trasladase a proposta de eu asumir esta responsabilidade. Estou agradecida tamén a Avia Veira, porque creo que cumpriu un papel fundamental para levar a voz e os principios nacionalista ao Concello da Coruña. Síntome honradísima, eu xa viña acompañando o traballo do Bloque Nacionalista Galego. Dixen si porque acredito nas persoas da candidatura e porque estaría encantada de traballar e compartir a miña bagaxe e experiencia”.

Queixas falou tamén para La Opinión Coruña, e mostrou a súa disposición a mudar as cousas na Coruña: “Temos que tecer desde o presente o que van ser os vindeiros catro, oito ou doce anos, os tempos de agora non son os de 2015. Temos que construír moitos futuros. A nosa aposta ten que estar na análise real do día a día sen perder nunca o fío de onde vimos e tamén cales son as nosas propostas de traballo, amosar as nosas ideas e poñer a producir todas esas áreas nas que temos capacidade de goberno. Nós non traballamos de cara á galería, non soñamos simplemente, sabemos que as nosas ideas se poden facer realidade”.

Apenas uns días despois do avance do primeiro tramo da candidatura, coñecíase que o catedrático e exreitor da UDC Xosé Luís Armesto pechará a lista. Un posto, o número 27, tamén de relevo, despois de que Francisco Jorquera afirmara que espera contar con Armesto para definir aquelas políticas públicas que teñan que ver coa universidade e a innovación. Nunha entrevista en La Voz de Galicia , Armesto lembrou que leva no BNG “desde antes da fundación do BNG. Desde os inicios manteño a mesma postura nacionalista, aínda que nunca participei na vida orgánica”. E engadiu: “a situación semella relativamente complicada, parece que non se van dar maiorías absolutas, o que pode contribuír a facilitar desde o BNG un goberno progresista, de esquerdas e con trazos nacionalistas”. O exreitor sinalou que comparte os principios e os obxectivos do BNG e explicou que o nacionalismo aporta “honradez, a defensa dos servizos públicos, a loita contra a desigualdade e a capacidade de xestión”.

Partilla!

Share on facebook
Facebook
Share on twitter
Twitter
Share on whatsapp
WhatsApp
Share on telegram
Telegram
Share on email
Email

Deixa un comentario